|
|
حزب مردم بلوچستان Balochistan People’s Party بلوچستانءِ اُستمانءِ گــَل |
|
|
ناصر محتشمی
میرکمبر
ھر راجےءَِ را وت یک راجدپترےءِ "تاریخ" ھست اِنت ـ بوت کنت کہ کلمکاراں کم و گیش کتگ اَنت یا کن اَنت اِش یا کہ لھتے جاگاھاں افسانہ وڑا جوڑ کتگ انت ـ بلے اے الم و پکاانت کہ ھچ راجے بے بن نہ اِنت ـ الّم آییءِ کسہ چہ یک جاگاھے بنگیج بیت ـ بلوچ راجءَ ھم یکے چہ دگنیاءِ ھستین و زندگیں راجان اِنت، ھزار و دو ھزار سال اِنت کہ بلوچستانءَ زندگ گوازینگااِنت و پہ وتی و وتی سرڈگارے پھریزگا ھزارن سر و جانی باھینتگ ـ بلوچ راجءِ راجدپتر سینگ پہ سینگ شئرءِ وڑا نوکیں نسلءَ دئیگ بوتگ ـ چہ بلوچءِ کم زانتی و بیسوادیءَ انگریز، یونانی و پارسی و دگہ راجانی کواس و زانتکار و تاریخ نبیس بلوچ راجءِ تاریخءَ پہ ھما وڑا کہ وت اِش لوٹ اِتگ نبشتگ ـ گندہ تر چہ اشی وھدیکہ رضاشاہ پھلویءِ ارتش بلوچستانءِ سرا اُرؤش کنت و بلوچستانءَ را وتی یک بھرے زانت، بلوچءِ بیچارگی و سیہ روچی بنگیج بیت ـ اے وتسرین و وت واھیں شاہءِ گپ اِشی اَت کہ ایرانءَ یک زبان و یک راجءِ"پارسی و ایرانی" ھست اِنت ـ درستیں وانگجاہ اں (مدرسہ) پارسی زبان و ایرانیانی تاریخ وانینگ بوت و بيگااِنت ـ اے دگہ راجانی زبان و تاریخ ڈالچار کنگ بوت انت ـ بلوچءِ سیاھین شپ گؤں اے وتسریں شاہءِ پگرا روچ پہ روچ تھارتر بیاں بوت ـ اے ناشریں شاہءِ گیر انسانی کارءِ کارپد مروچی ماں بلوچستانءَ پدّرانت ـ ما گنداں مروچگیں دیما شتگیں دگنیاءَ بلوچ راجءِ راجدپتر، زبان و دودربیدگا چہ پیم ڈالچار و زوال کنگااَنت ـ اگر کسےءَ بلوچ راجدپترءِ وانگ و زانگے مھر و دوستی ببیت گڈا ھنچو کہ اے دگہ راجانی تاریخءَ پُر چہ انسان دوستی، میار جلی، مھمان دوستی، بھادری و عاشقی شیرکنین کسہ و داستانان اِنت ـ ھمے درگتءَ منی زردءَ منا سِکین دات کہ میرکمبرءِ بھادری و گیرت مندیءِ شئرءَ کہ چہ پیم وتی بانؤرا کہ نوک آرؤس بیت سؤن "طلاق" دات یا تھنا کنت بلے وتی راجءَ چہ مھرابءِ بندا آجو کنت، گؤں وتی کمیں زانتءَ کسہ وڑا نوشتہ بہ کنان ـ
یک روچے مھراب و عثمان و مزار گؤن پنچ سد کسءَ چہ دزک سراوان لشکر کن اَنت و پہ مال جنی بنت و دھان رواَنت ـ
شاعر اے ڈول گشیت:
فوج اَچ سراوان چنڈاِتگ، چہ دزکی گنجیں دراں، پنچ سد گچینی کنگراں، دُراہ زھمجنیں براھندگاں، کؤر و دھان مان دینت، کؤر باھوءِ پشتی کتگ، سوچ انت گھی دشتءُ و دراں، گؤں احمدءَ میڑینتگ ات، بگ اِش ملؤرانی جتگ ـ ھنچؤ کہ شاعرءَ گشتگ مھرابءِ لشکر بنت و دھان اُرش کنت ـ سیسد بلوچ بندیگ کنت ـ سد جنینی گؤر برّانت و چھل جنک اَچ ملؤرانءِ گراں سریں کاڑاں ھم بندیگ کن اَنت ـ اُشتراں چہ میتگءِ سھر و زرّاں بار کن انت ـ تن تنا میتگءِ بانؤر و سالؤنکاں گؤں ھنی این دستان ھم بندیگ کنت و برانت ـ نپر تچان بیت و رؤت میر کمبرءَ ھال دات، بیا کہ مھراب و عثمان و مزار تئی ھلک جت و رُپت و شت انت ـ سوچنی ھم بازارءَ پشت اِش نہ گیتکگ ـ میر کمبر اے ھالءَ کہ اِشکنت سک ھژم گرایت و پاد کیت و گلامءَ توار جنت ـ َمدار دھکاں منی بؤرءَ زیں کن و بیار ـ کاردار میرءِ بؤرءَ زین کنت و تنگا پہ دلجمی بندایت و میرءِ لوگءِ دپا اُشتارینیتی ـ میر چہ لوگا در کپیت و پدا گلامءَ توار جنت و پرمایتی: برؤ منی مات و گھاران بیار ـ گلام تچان بیت و میرءِ مات و گھاراں ھم توار جنت و گشیت بیاات کہ واجہ پہ سپرے سرگپتگ چہ شما رکست لوٹیت ـ میر کمبرءِ مات و گھاراں تچان بنت و وتارا پہ میرءَ رسین انت ـ میر دیما گؤں ماتءَ کنت و گشیت: ماتی منی مات مکھین شیراؤں پھل کں من رؤاں مں کہ رؤاں داواگری زاناں نہ ترّاں چے بری
شیرزال اے ڈؤل پسہ دات :
اؤ بچ منی بچیگ منی، اؤ جان منی جانیگ منی میرکمبرءُ ونگيں ملوک شیراِت پھل اِنت ھپت برا ـ من کؤل بستگ پہ ھنچوشین روچان ـ آستیگ اؤں سھیلءَ دیمپان کت کہ تؤ سؤھیلی مہ بئے ـ برؤ اؤ بچ منی بے مال و بندیگاں میا ـ زھمءَ جن ءُ نامءَ درار ـ پت و پیرانی نامءَ نؤک کں ـ اگر بہ گنداں کہ بندیگ برؤانت و خاران سر ببنت و تؤ زندگءَ واتر کنے شیرات حرام اِنت منی ـ بزان اے نؤہ ماہ و نؤہ رؤچ و اے درد کہ مں پہ تؤ کش اتنت ھنچؤ گشے بزاں من امب برّات اَنت و کرک پَل کت اَنت " کرک یک زھریں و کشندہ ایں درچکے" ـ بزاں مں زھریں کرگ آپ داتگ انت ـ اے منی درستین زھمت برباد و زوال بوت انت ـ بلے اگر بگنداں کہ تئی بندیگ پدا واتر بہ کننت و بیاانت منی کلءِ دپا دیوان بہ کن انت و تئی کوشے "مرگ" کسہءَ گؤں من تاریپ بہ کن انت گڈا الّم بزاں کہ پدا ورناء باں ـ گؤں چاپ و نازینک ات پہ کبرا براں ـ ننداں گؤں کاڈاں مؤتکءِ بدل ھپت شپ و روچ ڈھل و چاپ و نازینگ کناں ـ کؤل انت پدا تئی پتءَ نؤکیں نکاھے پر کناں و تئی مٹ ءُ بدلا پیداک کنان ـ ماتءِ سؤچاکیں ھبر میرءَ سک سؤچنت ـ میرکمبر درّاینیت: او منی مکھیں مات چؤشیں سؤچاکیں شگان اؤں مہ جن ـ من تئی گؤرے شیر مِتکگ انت ـ کَؤل اِنت منا ھر وھد کہ گؤں دژمناں دوچار بہ کپان گڈا گؤں ھشکین دستاں پچ نہ ترّاں ـ پہ پد کنزگ و تچگا دل منی ایمن نہ بیت ـ اگر منی بندیگ خاران بہ رواَنت، منا ھم کؤل انت کہ پاگ نہ بندان و لؤگا نندان و جنءِ جؤد نباں ـ میرکمبر دیما گؤں گلامءَ کنت و گشیت: برؤ منی دؤستءَ بیار ـ (دؤست= جن، لوگ بانؤک) گلام میرءِ بانؤرا توار جنت ـ بانُک گؤں درّیں دپ و بچکندگاں تچان بیت و کئیت میرءِ کرّا و نرمکیں دستءَ ایر کنت میرے سرباسکاں و گشیت : کمبر شرّ ھیال کن ـ انگت یک ھپتگے اَچ منیگ و تئی آرؤسءَ نہ گؤستگ ـ آرؤسی گُد انگت پؤلنگ نہ انت ـ دستانی ھنی دور نہ انت ـ کِلے منا تؤ رؤے ـ منا کئی باھوٹ کنے ـ بے تؤ من نباں ساھتے ـ میرکمبر دستءَ کیسگءَ کنت و سے اشرفی ٹک کشیت و گشیت: اؤ منی درّیں پری، اؤ سؤمری اؤ گل پری اؤ شاہ پری درستین جنانی سروری، روچ و ماہءِ ایر گؤری نیست انت ترا نیک و بدے ـ بزور اے سؤن و مھرانت تئی "طلاق" ـ اِچ من و ھدا اِت رکست اِنت ـ برو گچین کن یکے اِچ من گہ و گھتر ببیت ـ الّمان ترا تئی مٹ رسیت ـ ترا ھچ پرواہ نبیت ـ بلے گار و وار بنت منی مات و گؤھار ـ تا زندگ اَنت سؤچ اَنت و پَل پَٹ اَنت ـ بانور جنت ھیسکگے گریواں بیت و وتی کؤٹیءَ گؤزایت و زار جنت ـ میرکمبر پدا سھڈینیت و گشیتی: اؤ منی ماہءِ دروری من رواں جنگا جناں و واترّ بان ـ وشی منی ھما روچ اِنت گؤں تؤ کہ ھلکے بندییں کاڈ پدا بیاانت ـ بزم و بؤپانی سرا ننداں تئی کشا کسہ و تاریپاں گؤش کناں آیانی ـ ھمے وھدا میرءِ پت، سلیمان رسیت ـ کمبری بؤرے مھارءَ گریت و گشیت: کمبر ھیال کن ماں دلا ـ ما پہ کھچری ادا آتکگ اں ـ تؤ مارا کلے و جنگا رؤے ـ منا بزگیں پیر مردا کؤر کنےـ چؤش مہ کن کمبر مارا آسی مہ کن ـ تؤ کِکے نہ اے کہ پدا تیجار جنے ـ کمبر من الّماں تؤ کہ اے جنگا شتے پدا واتر نہ بے ـ میرکمبر جواب دات: اؤ منی آریپین پت، ویل کن بؤرے مھارا ـ بل اے نرمین گپ و پریاتاں ـ منی سکیں دلا سست مہ کن کہ گؤں سستین دلاں داوا نہ بیت ـ مں اگر اَچ جنگا واتر کناں تا سے برا کوکار جنان و گؤشاں دُرّا مزں زھم اِدا نہ انت ـ میریں حسن زندگ نہ انت ـ رستم گؤں شیری پنچگاں ـ ویل کن بابؤل منی بؤرے مھارا ـ بل اُؤں کہ زھر چہ دلا گؤستگ اَنت پہ مھرابءِ لشکرءَ ـ کبلھیں پت، دلجمان پدا واتر نہ باں، بلے نیلاں مَلورانی گلیں جنکاں مھرابءِ دان درؤش ببنت ـ ھمراھانءَ توار جنت و گشیت در کپ ات ـ کمبر لشکرا زوریت رھادگ گرایت ـ میرءِ چاروگ گشیت ـ پَروم دورانت، بیااِت سدیچءِ کنڈگءَ بنداِں وھدیکہ مھراب کیت مان کپ اِں و تیر سؤچ کن اِں اے لگؤرے لُڈا ـ میرکمبر گؤں لشکرءَ سدیچءِ کنڈگا بندانت ـ وھدیکہ مھرابءِ لشکر کیت و گندایت راہ بستگ، رستم توار جنت و گشیت کئے انت کہ راھی بستگ؟ دور بہ ات اَچ منی راہءِ سرا کہ سرکؤنڈ لگ اَنت شمئے دلاں ـ میرکمبر پسہ دات: اے بزگیں کمبرانت تئی راہءِ سرا ـ رستم جواب دات: کمبر گریب و بزگے نہ انت ـ بنت و دھانءِ واجہ انت ـ نہ سد 900 گِدامءِ مسترانت ـ لاشارءِ مزں نامین زھم جن انت ـ کمبر بیا من و تؤ سُھل کن اں ـ اے بندیگاں جن اں و نیم کن اں ـ نیم اش ترا دیاں و ترا پہ اُرز کنان ـ آ دگہ نیمءَ پہ خاران براں ـ لھتے دیان پہ جنی جھازاں و لھتے براتانی شلوار کنان ـ لھتے آپ کش و اپسانی کاہ چین کنان ـ میرکمبر کہ مھرابءِ سوچاکیں تنزانءَ کہ اشکنت آیی ھم پہ تنز پسہ دات: من ھم زاناں کہ تؤ مھراب نرۓ و اے مھلوک تئی بندیگ انت بلے اے درست منی مات و گؤھار انت، منی ھپت پشتی ھؤن و رگ انت تا من زندگاں تؤ برتش نہ بے، وھدیکہ من ات کشت گڈا آ وھدی چؤن کنے مستر وتے ـ الھیار میر کمبرءَ توار جنت و گشیت: اؤ میرکمبرءُ و سبزیں سگار جنگ کنے دستاں مدار ما جنگءَ کنیں گؤں تؤ ھلار جنگءَ بنگیج بیت ـ چہ دوئین نیمگا بازیں کسے کشگ بیت، بلےگیشتر چہ مھرابءِ لشکرءَ ـ کمبر بندیگاں آزات کنت و چہ جنگ جاہءَ یک گؤراش کنت ھؤر گؤرارگا لگیت ـ تپنگ و شؤرہ تُس انت و چہ کارءَ کپنت ـ پدا الھیار کمبرءَ توار جنت: میر نوں زھمءَ بہ زور و دستاں مدار ـ چہ دوئین نیمگا زھم جنگی بنگیج بیت ـ کپنت یک و دگرے جانءَ کؤررانی ھؤن جھلاد بیت ـ لگیت زھمے مھرابءِ پاگا، پاگ دور یک ھدے کپیت ـ مھراب توار جنت وتی لشکرءَ ـ اؤژناگراں اؤژناگ کن ات بازیگراں بازی کن ات میرکمبرءَ دستی کن ات شاھانی پیشکش کن ات پہ گنج و مالءِ آرگءَ میرکمبر چؤ استونءَ گرندان بیت و چؤ کوٹگ و تیجگءَ مھرابءِ لشکرءَ کپ کپ و چاک چاک کنان کنت ـ مھرابءِ لشکر پرؤش وارت ـ بازینے پشت کپیت تچ انت ـ میرکمبر وتی مھلوکءَ جم کنت و رھادگ گرایت اناگتءَ لگیت تیری میرکمبرءِ دلا ـ پاگی چہ سرا ھُرجیت و کپیت ـ ھرچی پشت کپیت میرءِ لاشءَ و بندیگاں زورانت ملوراں برانت ـ میرکمبرءِ مات بازارءِ کاڈان جم کنت و مؤتکءِ بدل چاپ و نازینک کن انت ـ
ناگاں پہ فرمانءِ ھدا تیرے مَنا جُمپءِ سرءَ لگ اِت منی میرءِ دلءَ پاگی لگشتگ چہ سرءَ بُرجی ھرتکگ نر مزار بنداں ھلو ھالو کتگ موتکءِ بدل لاڈو کتگ میرکمبر اِش سالونک کتگ کمبر ھلار بات اَنت ترا چَنڈینگ و ماتی ستا آ پاسی شپءِ میچینگاں آ روچ کہ شیرءَ جنگ کتگ روباہ و ڈالاں پُل کتگ بیگاہءِ کوشءَ کش اِتگ پنچاں کَپّرگ ماں کتگ میر کمبرءِ زھمءِ توار دھلی شتگ تا کندھار کشمیر تا بلخ و بھار چانگو تا سیستان ھر قدر
دلگوش: اے کسہ اَچ میراث کتابءَ زورگ و نبیسگ بوتگ ـ اگر کمی و گیشی ھستنت چہ بلوچ راجءَ پھلی لوٹان و شمئے رھشونیءِ مھتاج اں ـ
|