|
17-06-2006
زرمبش پشت کپیت
یا نہ؟ 1 بھر
ولید گربنی
راستیا بچارۓ زرمبشء تاریخ کؤھن انت۔ بلوچء راجی جھدا 30 سال یا گیش انت کھ
گلائیش انت۔ 30 سال پھ بلوچاں نیم عمر انت۔
اے عمرا زرمبشا بلوچ راجء سرا بوتگیں ظلماں چھ نوکیں نسل او دگنیاء سھیگ کنگا
وتی دست ھور کتگ۔ ردء نھ بیت اگر گشگ ببیت کھ زرمبشء کرد چھ آ دگھ پھکیں ٹؤلیاں
ماڈرن تراو گؤں راجی ضرورتاں نزیکتر بوتگ۔
آ مردم کھ گؤں زرمبشء جھدکاراں ھم سلام بوتگ انت آھاں مدام زرمبشا جھدء تیزتر
کنگء سکین داتگ، بلے زرمبش گؤں وتی مدامی عذرا 'ھنّوایرانء جاور ھنچوش انت' وتا
رکّیتگ۔ھمے عذر لھتے جھدکارانی چھ زرمبش درکپگء سوب ھم جؤڑ بوت؛ بلے زرمبش گشت
'جھان بھ سریت، من نھ سراں'۔
آ کھ چھ زرمبشء سست رواجیا بیزار بوت انت، پیش کنزت انت او پھ وت اش دگھ دؤست
درگپت۔ لھتے دگھ امیدوار تنت کھ وھدے ایرانء جاور ٹگل انت گڑا الّما ھنچؤ کھ
زرمبش گشیت وتی فعالیتان گئیش کن انت۔
ھنّو کھ ایرانء سرکار بلوچانی سرا آس گوارگا انت زرمبش گؤں یک ودو تظاھرات وتی
راجء بیگناھیں جوانانی رتکگیں ھؤنانی خلافا جھد کنؤکانی ردا وتی ناما ثبت کنگء
جھدا کنگا انت۔
مروچی باید ات کھ زرمبش گؤں ناصر بلیدہ ئی، عبدالستار دوشوکی او آدگراں ھؤر
ببیت او بلوچء بزّگیء حالا دگنیاء گؤشاں برسینیت۔ بلے بژنء گپ انت کھ آ ھنگت
گؤں کسانیں گپاں مانگیشتگ، چؤکھ پھ بلوچستانء بیرک استمانی گلا پیش کتگ چمشکا
ھراب انت!
مردم الّم نھ انت کھ باریں یک یا دوپشتکپتگیں فعال چھ زرمبش دربکپ انت، زرمبش
پشتکپیت یا نھ !
زرمبش پشت کپیت
یا نہ؟ 2 بھر
19-06-2006
ولید گربنی
ھنچؤکہ عرض بیتگ ھنّو جاور چہ آ حدّا گؤستگ انت کہ زرمبش گؤں ترمپے خونء ریچگا
وتی ناما شھیدانی لڑا ھؤر کنت۔ زرمبشء تاریخا چہ کس منکر نہ انت، بلے سیاسی چست
وایرانی توکا شدّت آیگ ھمے تقاضا کنت کہ زرمبش چہ وابا پاد بیئت و آ دگہ
جھدکاران گؤں ھمکؤپگ یا ھمگام ببیت، اگر چہ آھاں پیشگام بیئگ سک باز انت۔ و اگر
نہ پھکیں قلمکار و راجی دوستواھاں باید انت کہ وتی ندا زرمبشء گرانوابی سرا کار
ببند انت۔ من الّمون بلوچ ملّتء واھگ ھم ھمش انت کہ وابیں راجپھازیں سیاستکار
چہ وابا ڈاہ دیگ ببنت۔
آ دور کہ زرمبش وتا گؤں بھانہ چہ کچّہ چنگا در برتگ شت۔ نوں بید چہ اے حقیقت کہ
بلوچستانء میتگاں سرکاری نیرو مانرتکگ انت اومیارگ و بےمیاراں، چک و جنیں آدم،
کماش و جوان ھر کس کہ ڈیک دنت کشگ، جنگ یا بندیگ کنگا انت؛ بلوچ ملّتء لؤٹ چہ
وتی سیاسی پانکجناں گیشتر انت۔ ملّت کوکار کنگا انت
' اے رھبریء دعوادار تو پچیا خاموشے؟ منا درنجگا انت، تو کجاۓ! منی لؤگ
ببمباراں بوتگ، تو پہ منی پانکجنیا چے گشتگ او گؤں کیا؟ من گؤں آ دگہ زیر ستم
ایرانی راجانی ھمکؤپگیا چست بوتگاں، تو پرچے آ دگہ راجانی رھدربرانی ڈولا منی
پانکا نہ جنگا ۓ؟ تئی وتی روچدراتکی براتاں وتی مھلوکء جیڑہ بین المللی کتگ، تو
پچے پہ من ھما ڈولا بیواب نھئے؟ چست بؤگء سکین تو منا دات، نوں من پاد آتکگوں؛
تو پچے وشوابے؟'
زرمبشء گورا راجء ھمے جستانی پسّو ھست انت؟ اگر نہ گڑا پچیا جاہ نجنت؟ اگر واب
وش انت، سارتیں ساھگ رمبینگ نبیت گڑا گؤں کجا حقّا شعار دنت و گشی کہ سلطنت طلب
خراب انت، جمھوری اسلامی رد انت گؤں آھاں ھور مبیت؟ یا پچے وتی رھبریا استمان
گلء ناصر بلیدہ ئیء دستا نہ دنت یا دکتر دوشوکیء دیما تسلیم نہ بیت؟
راجی جھد چہ یک شعاریا سک باز گئیشتر انت۔ زرمبش ھمنچو زودتر بماریت او گام چست
بکنت راجء بھت دیم پہ گھبودیا زردتر ٹگلیت۔
زرمبش پشت کپیت
یا نہ؟ 3 بھر
20-06-2006
ولید گربنی
اے تبلیغاتء دھرانت۔ ھرکس کسانیں گامے کہ چست کنت آ توانیت گوں حد اکثر تبلیغ
حد اکثر نمرہ score بکنت۔ بلے بلوچ بطور عام او روچ نشتی بلوچ بطور خاص اے پڑا
نزور بیتگ انت۔ ھر کس زانت، اشیء سوب واجہ خدا نہ بوتگ۔ بلکہ بلوچء گؤرا بھانہ
باز بوتگ انت۔ بلوچا راڈیو نہ بوتگ، ٹلی وژن یا روچتاکاں چہ زبھر بوتگ- بیست و
یکّمی کرنء دیمرئیاں بلوچء اے نزوری وتی ھرجاں کتگ انت۔ گوں کموکے ھوش، تشے
واھگ او مقدارے توان بلوچء دیما کس داشت نہ کنت اگر آ وتی راجء گؤانکا دگنیاء
ھر کنڈا رسینگا بہ تکشیت!
آ دگہ دھرے ات کہ زرمبشء کاریاں پھ ترس و لرز وتی سازمانء ارگان وتی ملکء تھی
باسکاں(اگر) رسینتگ، ھنّو آ ڈولیں تاکبندانی شنگء خرچا چہ ھم زرمبش چٹّتگ۔ ھنّو
لازم نہ انت کہ چہ ملکا پہ خبرئےدر کنگا زرمبش وتی باسکانی زندا خطرا دور بدنت۔
ھنّو بلوچ وت وتی سرا لگّتگیں لٹّء سوزمانا کوکّار و صلوات کنگا انت۔ ژرمبش بس
ھمے چیحالا echo بکنت۔
اگر زرمبشا کد حزب مردم بلوچستان واک نہ کنت کہ وتی باسکے اد و اؤدا دیم بدنت
تا دگنیاء گؤشاں بلوچء بزّگیء حالا برسینت گڑا آھیء رھبری گؤں کجا حق دگراں
ایراز گریت؟ گؤں چے دلیل زرمبش ء راجدوستیں باسک انگت گؤں زرمبش وفاداریء نمکء
بندیگ انت؟ بید چہ ھمے کہ زرمبشی نشتگ انت خر بمریت آ پالامۓ ببوج انت؛ آھانی
گؤرا راجء پسّوا دگہ دلیل ھست؟ یا زرمبشی راجء سرا چد بدتریں تباھیء وداریگ
انت؟ اے جست پسّو اگر 'ھو' انت گڑا باید چہ اے واھگا بیمرادیء گؤندو دیگ ببنت۔
گرانکدریں زرمبشیاں، مردمیاں، دمکراتاں، جبھہ یاں و مبارزاں!
ھرکس الّم انت کہ شما پھک راجء وتواجھیا، گھبودیا، آزادیا او دیمرئیا لؤٹؤک ات۔
پھک زانت کہ شمے وسایل انچو نہ انت کہ یوکا گؤں وتی توان؛ وتی مقصداں سؤبیں
ببیت۔ ملّت ھم سھیگ انت چہ شمۓ جاوراں! شما کہ وتی 'وبسایتاں' پہ وھد update کت
نکن ات، یوکا شمۓ دستا راجء حق پچگرگ ھم نہ بنت۔
پیش چہ اش کہ ملّت خلقی ببیت، سلطنت طلب یا مزھبی بنیادگرا؛ باید انت آ را
احساس دیگ ببیت کہ شما ھست ات، تپاک ات، منظّم ات و فعال ات۔ شمے تپاکیء نشاں
مردمی بیرک انت، شمے نظم ثبوت ھمگوانکی ببیت او فعالیتء سمبل دوشوکی، بلیدہ ئی،
مسعود و دگہ ببنت۔
اگر گؤں شما چؤ بوت نکنت گڑا شمے ھر دؤزواھا حق انت کہ شمۓ راجدؤستیء سرا، شمے
استعدادء سرا و یا شمے نیتء سرا شک بکنت، نکتہ چینی بکنت او شمارا بڈؤباریت۔
|