|
حزب مردم بلوچستان Balochistan People’s Party بلوچستانءِ اُستمانءِ گــَل |
||
|
Wednesday, 13 June, 2006 بند و دیمپانان
نبیسوکان: دیل
کارنگی، جیمزآلن، الاویلر ھر چنت کہ ھستگین دیمپانان شمئے و شمئے مکسدءِ نیامءَ مزن گندگ ببنت، بلے پدا ھم بزان اِت کہ پیشگین پروش ورگءِ ڈوبارگ و سرزنشان پہ آ مؤلءِ رسگا، شمئے دلگوش پہ شری گؤر بیت ـ بازیں کسانءِ بوتگ اَنت کہ چہ چُشیں دیمپانان گؤستگ اَنت و پہ شرّی سؤبیں و وتی منزل و مرادءَ پُج اِتگ اَنت ـ اگر شمئے واک رسیت شنکانءَ چہ دگرانی راءِ سرا بگیشین اِت، یا کم سے کم آیانءَ رھشونی کن اِت کہ اڑ و جنجالانی تھا مہ کپ اَنت ـ توری اگر شمئے واک رسیت آیانءَ تا کشے راہءَ گؤن وت ھمراہ کن اِت تا کہ پہ اے راہءِ پیش روگا دلگرم ببنت ـ بلے ھجبر وتی سستی و سؤبین نبئیگءَ، وڑ وڑیں ھالات و جاورانی سرا مہ لڑاِت، طبیعت، آ جاورے کہ لازم ببیت وت تیار کنت و ھالاتءِ سرا مسلط بیت ـ اے درستین نکتہ آن، شمئے روحی واکءِ کساسءَ گون ھمگرنچ اَنت ـ شما واکمنداِت و وتی درستین جانءِ اعضایانی واھند ـ آسان شما توان اِت چہ کوہءِ کہ شمئے و سؤبین بئیگءِ نیامءَ گر و چیل اِنت، جھل ائیر کپ اِت و ھما پیم وتی مرادءِ نیمگا بتچ اِت و پہ سوبین بئیگءِ بئیگا گیشتر چہ پیسرا واکمند ببت ـ بلے بزان اِت کہ مدام شمئے رندا لھتے پیداگ اَنت: مردے لنگ جَنان کہ یک پادے نیستی، نابینائین مردے و مردے کہ سرینی گرانین بارءِ چیرا لُچتگ و نتوانت وتی بارا پہ یک دمانے ھم زمینءِ سرا ائیر بکنت ـ پہ اِشان ھپتگان، ماھان و سالان لازم اِنت تا کہ چہ آ گر و چیلے کہ شما چنت ساھتءَ گوازینت، اِشان بگوازین اَنت ـ گڈا باز شرّ و عادلانہ ایں کارے کہ چد و باد پھلوانانءَ ھم پہ کمک کنگءَ بلوٹااینت و دیمپانانءَ چہ آیانی راہءِ سرا چست کن اِت ـ البت گون اے ھیالا ھستین وھدءِ مردمانی چار و بیچار الّمی اِنت ـ تورے گون آ اڑ و جنجالانے کہ ھست اَنت، آ کسانے کہ ڈڈّئین روحیہ اے واھند اَنت، تیارتراَنت و پہ ستک و دل و پکا وتی راہءَ روگااَنت، زندگیءِ تھا گیشتر چہ درستان سوبین بنت ـ بلے لھتے بند و دیمپان ھست اِنت کہ جاگاہ اِش راہءِ سرا نہ اِنت ـ اے بندان سبب بنت تا کہ سدانی رھگؤز و مساپر کہ نہ پاداِش ھست کہ برواَنت، نہ گندوکین چم و نہ اُؤشتگءِ واک، تگءِ کرّا بکپ اَنت و ھلاک ببنت ـ شمئی سراَاِنت کہ اے بند و دیمپانانءَ چست کن اِت و راہءَ پہ مساپر و رھگؤزاں ھم سلہ و ایمن کن اِت ـ ھجبر تگ و راھانی کرّا مننداِت و مگؤش اِت کہ مشکلانی ھستی مئے دئیر کنگءِ سبب پہ مئے مراد و مکسدانی رسگا بوتگ ـ ھکیکتا اے گپ گوں بدی و مزنین عیبے وڑا، سُستیانی منّگ و درانگاز کنگ اِنت ـ پہ وتی مؤل و مرادانی رسگا، ماں بے وس و لاگرین مساپرانی بڈ و جؤنءِ سرا پاد ائیر مکن اِت، گؤں تکبر و وتگلایی مگؤش اِت " ھر کسے کہ بلوٹیت و جھد بکنت توانت چہ گر و چیلان و بند و دیمپانان بگؤزایت، من جھد کت و سوبین بوتان!" گوں اے ڈول گؤشگا جار جن اِت کہ کسے ھست اِت وتواہ و جدا چہ دگران! ھچ شکے نیست اِنت کہ بے وس و نابینا و ناتوانین کسان ھم، توری آیانی راہ گر و چیل ببوتیں، توانت اِش پہ وتی مکسد و منزلا سر ببنت، پہ اے شرتا کہ یک پلیشکے آیانی درونا جان بگپتین و چہ واکے کہ خداوندءَ آیانی جانءِ تھا امانت ائیر کتگ سرپد ببوتین اَنت ـ آیان توانت ھر وڑیں جاوارنی تھا پہ ھر چیزے کہ آیانی مکسد اَت برس اِتین اَنت ـ بلے مدام ھزاران مرادیگ و دمبرتگیں زیارت کنوک، بازین جھد و سپرے محنتءَ پہ وتی مکسدءِ رسگا گوں وتی سرا زوراَنت ـ گوں اے درستان، آیان اَنگت پہ آ کمال و جاہءَ سر نبوتگ اَنت کہ آ امانتے کہ خداوند آیانی دلانی تھا ائیر کتگ، پجاہ بیاراَنت ـ اگر اے وڑیں مساپرانی سرا ناروا و گیشین کنگ بوتگ، آ کارانءَ شرچاری کن اِت و ھر چہ کہ شمئے توانءَ ھست اِنت جھد کن اِت تا کہ گیشین و بے عدالتیانی آھونڈ گوجگ ببیت ـ بلے پہ اے ھاترا کہ محدودیت و بند و دیمپان ھست اِنت، ھجبر فردی سوبین بئیگءِ ودارا مکن اِت ـ پہ ھر چیزیۓءِ تسلط و آییءِ چارگردءِ گرگا، وتی خداداتی واک و توانءِ سرا پکّا یکین بکن اِنت ـ مدام وتارا ھنچو بزان اِت کہ گون خداءِ کمکءَ ھر وڑین کارے معجزہ وڑا کت کن اِت ـ ھما ڈول گون ھنچیں جھدے سوبین بئیگا وتی واھگ بکن اِت کہ آھن ربا آھنءَ وتی نیمگا کشیت ـ وتی راہءِ سرءِ بدیانءَ بگیشئن اِت و صوابءِ دروشم بدئیت، بلے ھجبر توری یک دمانےِ ھم، باور مکن اِت کہ امکاناتانی ساڑی و جاڑی نبئیگ شمئے پروش ورگءِ سبب بیت ـ پہ اے ھاترا کہ اِشی شما وت اِت کہ امکانات پیداگ بکن اِت و بند و دیمپانانءَ چہ راہءِ سرا چست بکن اِت ـ
|