حزب مردم بلوچستان Balochistan People’s Party بلوچستانءِ اُستمانءِ گــَل

01-07-2006

تاسے آپ و صد سالء وفا

ولید گربنی

مدتے پیش واجہ عزیز مبارکی (بلوچ) یک درجکشیں شعرے 'ملا خمینی مرحبا' سرگالء سرا نبیستگ ات، اے شعرء تھا بلوچے کہ ایرانء ظلم و زورانی سوبا روچنشتی ملکاں وتا رسینگ سوبیں بوتگ انت او آسودگیں زندے گوازینگا انت طنز کتگ انت۔

آ وھدی مں واجہ مبارکی اے درگتا باز ایراز گپت، شاید چمشکا کہ واجہء سیاسی وژن پدّرclear نہ انت۔ بلے نوں کہ من وتی نظر دوارچاری reconsider کتگ مں پؤہ بوتگوں کہ واجہء طنزسرجمیا بے معنا نہ بوتگ۔

بلوچ کہ ماں روچنشتی مکاں پہ وشی یا گؤں دلسیاھی سـر بوتگ انت باید قدرتء شگرگزار ببنت۔ یکے چمشکا کہ آ انسان دؤستیں ملکاں سر بوتگ انت۔ جنداش آسودگ انت و آھانی چکاں شرّیں بانداتےء ضما نت ماں اے ملکاں ھست انت۔ آھانی سرا قدرتء دومی مھربانی ھمش انت کہ آ بلوچ ودی بوتگ انت او ھمے بلوچ بؤگ آھانی پجّار جؤڑ بوتگ۔ ھمے بلوچء ناما آھان ماں رونشتی ملکاں سیاسی یا اجتماعی پناہ رستگ۔

اے گپا ھچّ شک نیست انت کہ بلوچ فرھنگء مزنتریں بھرے وفاداری انت۔ بلوچ مڈل ایسٹا ببیت آ گؤں عـرباں وفا کـنت، پنجابء بلوچ اؤدا نمکء حقا ادا کنگا انت، ایرانء بلوچاں چہ یک و دو کساں کہ فارسء نمک اش بھر بوتگ آ ھم ھمے نمکء باراں چیئر بادے مروچی دنتانک کنگا انت۔ ھمے پیما روچنشتی ملکان سر بوتگیں بلوچ وتی خلوص و نیک نیتیء سوبا گؤں شرّیں دیدے چارگ بؤگا انت او ھما چاگردء توکا وتی صلاحیتانی مطابقا گؤں ایمانداری وتی بھرء ذمھاں ادا کنگا انت۔ بزانکہ بلوچ چہ وتی دؤدی گشتانکا 'تاسے آپ ورے صد سال وفا بکن' ھچبرشموشکار نہ بوتگ انت۔ آ دگہ گپے کہ برے برے ترانگ دیگ لؤٹ انت۔

مروچی ضروری انت کہ اے ترانگا ھم دیگ ببنت کہ چہ ھما سرزمین کہ آ ودی بوتگ انت، چہ ھما ربیّتاں کہ آھانی افتخار انت ؛ مہ شموش انت۔ آ نمکء حقا ادا کنگ چہ پھکاں گیشتر ضروری انت۔ چہ ھما ظلم و زوراکیاں کہ آھاں وتا رکّیتگ؛ آھانی سیاد و وارس انگت مانگیشتگ انت۔ ھما خاک چہ آھیء سرا رستگیں روزی وارتگ و رستگ انت؛ انگت بدواھیں دژمنانی پادمال انت۔ بلوچ انگت ماں وتی فضاء توکا پہ آزاتی گینے نفس زورگا محتاج انت۔ باید انت کموک چہ روچنشتی ملکانی داتگیں آزادیا سیت زورگ ببیت او تشے چہ وتی وھدا، وابا، مالا و صلاحیتا پہ ھماھانی خاطرا ندر بکن انت۔

اے نمکواریء حق چہ آھاں کس جست نہ کتگ ات اگر ایران، پاکستان یا دگہ شناختےء واھند ببوتین انت۔ او ھما پجّارا گؤں آھانی عاقبتء فیصلہ ببوتین ات۔ بلوچ و بلوچستانء زرتگیں ھمے نامء حقا ادا کنگ ھم پھکانی ذمھاں ھور انت؛ نیکہ چنت کسانی!