مروچی منی باندا تئ باری اِنت
 

ناصر محتشمی
29-12-2005

اے گپ مروچگین گپے نہ انت کہ بلوچ راج ٹوپ و بمبانی آماچ انت یا کہ آیانی گدامان ھر و ھشترانی سرآنت و پہ وت و وتی کسانین چک و
جنینان پناگاھے شوھاز کنگاانت ـ اے خانہ بدوشی و اے تپ و سُھرک چہ 14 اگست 1947 وھدیکہ چہ انگریزءِ نطفہءَ، ھندستانءَ نامشروعین چکے لاپا کپت و پیش چہ اِش کہ نوہ ماہ ماتءِ لاپا ببیت مکار و حیلہ گرین انگریزءِ سیاستمداران جراحی کت و اے آلودہ اِین چک اِش متولد کناینت و پاکستانءِ نام اِش پر بست ـ رند چہ آ روچا بلوچان ھم گون اسلام و برادریءِ ناما پہ مکاری ریپینگ و رد دیگ بوت انت و آیانی ھلارین ماتین سرزمین گون ناپاکین پاکستانءَ ھوار کنگ و پہ بلوچان دروگین بند و سیمسر گیشینگ بوت و اے درمیانءَ پاکستانی بلوچستان و ایرانی بلوچستان نام بندگ بوت انت ـ بلے پہ اِش کہ مکسد گؤن بلوچان نہ براتی و نیک مسلمانی ات، اے ڈنگ و رھزن و ڈونڈوارین رسترانی اصلی چھرہ پدّر بیان بوت و پہ بلوچ راجءِ بیگواہ کنگا وتی سرین اِش بست و چن و لانچاَ لگ اِتنت ـ

وھدیکہ پاکستانءِ ٹگین و ھون وارین حکومتءَ مان بلوچستانءَ وتی جاہ وش کت، گڈا سال 1958 میلادیءَ زلم و زور مان بلوچستانءَ بنگیج بوت ـ بلوچانی سیاسی چست و ایرانی سرا پابندی جنگ بوت ـ بازین بلوچے گرگ و بندی کنگ بوت انت ـ میرنوروزخان گؤن بازین بلوچے تپنگ زرت و کوھانَ شت انت ـ بلوچانی و پاکستانءِ جنگ بنگیج بوت ـ اے جنگءِ تھا بازین پاکستانی ارتشیءِ و سرمچارین بلوچے کشگ بوت انت ـ پاکستانءِ اشغالگرین ارتش بلوچ بھادرین جنگجوانی دیما پروش وارت و شرمندہ بوت ـ اے درگتا  بھٹو گون ایرانءِ شاہ تپاک کت و چہ آیی مدت لوٹ اِت ـ ایرانءِ بالی گرابان چہ دزآپ (زاھدان) چست بوت انت و بلوچانی سرا بمب اِش رتک ـ اے بمبگورایءَ سک باز بيگناھین بلوچانی جنین و کودکین چک ایران و پاکستانءِ تیر و ٹوپانی آماچ بوت انت ـ
مغربی بلوچستانءَ کہ مروچی ایرانی بلوچستان گشگ بیت و گجر وتی میراث و مڑاگاھے زانت، ھم ھمے ھال اَت ـ رند چہ میردوست محمد خان بارکزھیءِ گرگ و پاھو (اعدام) دیگا بلوچستان ایرانءِ ڈونڈوارین دولتانی لیب جاہ بوت ـ
مکسد چہ اے گپان اِش اِنت کہ بلوچ و بلوچستان مدام پاکستان و ایرانءِ لٹ و گزبانی چیرا بوتگ انت و اے دوین ملک ھجبر گون بلوچ راجا انسانی رپتار نہ کرتگ و منی ھیالا ھچ بلوچےءَ ھم چہ اے زالم و زد انسانین ملکانی سرکار و دولتان گلہ اے نیست انت ـ پرچے کہ بلوچستان پہ زور آوار جنگ و اشغال کنگ بوتگ ـ ملک و راجے کہ اشغال ببیت الّم آییءِ مال تاراج بیت و مھلوک لگتمال ـ گڈا مروچی بلوچانی زمہ باز گران بوتگ و یک پہ یکے زمہ اِن کہ وتی کردا پیش بدارانت و وتی دینا ادا بہ کن انت ـ ما بلوچان اشیءَ پکا بزانین آ لشکرے کہ چہ پنجاب رمبینتگ و مندی و گوادریءَ جنت و پلیت و مری و بگٹیءِ کودکین چک و جنینانءَ کہ پہ یک بیلے ورگ مھتاج انت شرور و شیطانءِ ناما اے زد انسانین پاکستانی ارتشءِ آس و گونڈلین تیرانی آماچ انت، باندا الّم اے آس منیگ و تئی لوگا ھم کیت و رسیت و منیگ و تئی واب و آرمین چکانی ساھگا کہ پہ ھیال ایمن انت، تبد و لوار کنت ـ
منی ھیالا نیست انسانے کہ اے عکسانا بگندیت و بگشیت اے پُچ و کؤشانی واھندا شرور و اشرار بوت کن انت! کجا سلامتین انسان دؤزین پاکستانءِ سرکارءِ گپا باور کت کنت کہ مری و بگٹی کہ پہ یک بیلے ورگ مھتاج انت بلے انگت نہ لؤٹ انت کہ آیانی شھر و ملک آباد ببیت و لاپ اِش سیر ببیت؟ کجا انسان انت کہ وشی و سلامتیءِ ھلاپ ببیت!؟ بلے اے گپا ھر بلوچے زانت کہ پاکستان نہ تھنا بلوچستانءِ آبادی و وشھالیءِ لوٹوک نہ اِنت بلکین ھما چکے کہ گؤن پس و ھشتر میچینگ و رودینتگ بوتگ ، مان گندان گون ٹوپ و بمب جنت و کشیت اِش ـ
 براتان، گھاران! ما شما درستانءَ الّمی اِنت کہ چہ اے گرانین وابا ھر چہ ماھلہ تر آگاہ ببین و اے آسا کہ مروچی مری و بگٹی و مندی کسانین چکانا پیلوشیت و کباب کنت بہ کش اِن و بیگواہ بہ کن اِن ـ اگر نہ دیر یا زوت اے آس منیگ و تئی زاتی لوگا ھم کپیت و منیگ و تئی نازگلین چکانا کہ پہ منیگ و تئی ھیالا پہ ایمنی سارتین ساھگا واب اَنت، ھنچوش پیلوشیت و کباب کنت و تا نسل نسلءَ آیانی سارتین ساھگا تبد و لوار کنت ـ انگت زوت اِن بیا من و تو ما بئین و پہ اے نہ کٹوکین تپا علاجے و درمانے در بہ گیج اِن ـ