میر غوث بکش بزنجوءِ زندگی نامہ کتابءِ دیمدرائی دیوانے ماں کراچی آرٹس کونسلءَ برجم دارگ بوت۔ دیوانءِ پاگواجھی گس منندیں قاضی رشید رضوی کت و روچتاک جنگءِ شونکار محمود شام خاصیں مھمان أت۔ اودا سیاستکار، وکیل و شھزانت سرجم إتنت و میر غوث بکش بزنجوءِ زند، جھد، اُصولپرستی، سیاست و کوّاسی إش ستا دات۔
دیوانءِ پاگواجھا میر غوث بکشءِ بازیں شرّی بیان کت أنت و گيئش کت کہ آ یک ھنچؤشیں سیاستکارے أت کہ ھچبر وتی اُصولانءِ سودا ئی نہ جت۔
'پاکستانءَ دربرگءِ بنجاہ'ءِ سروک سید جعفر أحمدءَ گشت کہ میر غوث بکش ھما سیاستکار أت کہ لیکہ ئی تچک و درا إتنت۔ شہ پیسرا سرپد أت کہ آئیءِ گامگیجانءِ ثمر و یا تاوان چے إبنت۔
جعفر أحمدءِ خیالا میر غوث بکش بزنجو یک ھنچؤشیں راست پسندے أت کہ وتی و مخالفانءِ سرجمیں واک و اوپارا ڈاہ أت۔ آئیءِ جھد پہ یک ھنچؤشیں سکیولر چاگردےءَ أت کہ اودا سرداری و جاگیرداریءِ بدلا بروبری رواج دیگ بیتین أت۔
گیشینتگین راهءِ شوهازیگ سرحالا شنگ بیتگینکتابءِ سرجم کنوک میر غوث بکش بزنجوءِ دیرییں ھمراہ بی إم کٹی إنت۔ زندگی ناموا شنگ کنگءِ کار میر غوث بکش بزنجوءَ وت آئیءِ ذموا داتہ بیتگ۔ ألبت إیشیءِ سرجم کنگ و رد بند دیگا باز وھد گوَستگ کہ نیں شنگ إنت۔
شامءَ درائینت کہ میر غوث بکش بزنجو حقیں خبرا کنگا ھچ نہ ترسِتگ۔ شہ فوجیا بہ گر دانکہ سیاسی واکدارانءِ دیما آئیا راستیں گپ ٹِـکـّا ٹک گشتگ أنت۔ إیشانءِ دیما سر ئی هم جھل نه کتگ۔ آئیا أفسوز کت کہ مرچییں دئورا چؤشیں سیاستکار نہ گواھیت۔
نشنل پارٹیءِ کارگشاد میر طاھر بزنجوءَ گشت کہ غوث بکش یک دانشوریں سیاستکارے أت۔ بلوچستانءِ سیاسی تاریخ بے بزنجوءَ ناسرجم إنت۔ آئیا گوں دانشوراں دوستی بیتگ. پمیشا گوں بلوچستان زانتجاہءِ أولی سروک پروفسر کرّار حسین و فیض أحمد فیض ھم دیوان بیتگ۔ " شرفداری و أرزشمندی تا زندءِ گڈی روچا آئیءِ ھمراہ إتنت" طاھر بزنجو سرکچ دات۔
میر غوث بکشءِ سیاسی ھمراہ یوسف مستی خانءَ کتابءِ شونکار ستا دات و گشت ئی کہ شونکار مدام پادمالیں قومانءِ ھمراہ بیتگ و بلوچانءِ بزگی ئی بیان کتگ أنت۔
دیوانءِ یک ترانکارے میر بیژن بزنجو أت کہ نمیرانیں غوث بکش بزنجوءِ مزنتریں زھگ إنت۔ میر بیژن گشت کہ بلــّی توریں آئیءِ پت وتی کاراں مدام دستگٹ بیتگ، بلے پہ وتی کٹم و سنگتاں وھد ئی کشـّتگ۔ إیشی مشکلیں کارے إنت، بلے غوث بکشءَ گوں سوبینی ھنچؤش کتگ۔
Source: Sources: dailytimes.com.pk, thenews.com.pk. Translated by WG
چاپ کنيد
اين مطلب را برای يکی از دوستان خود ايميل کنيد