حال ردا بی إس او -آزاد مند ھنکینءِ جھدکار موٹر سائکلانءِ سرا رالییےءِ درؤشما شہ مند رھادگ گپت أنت۔ إدا تمپءَ 'إبراھیم صالح رالی'ءِ ناما بی اس او -آزاد و بی إن إمءِ جھدکاراں لشکر کت۔ دوئیں رالی ماں شھید داکٹر خالد بلوچ چار راھا ھؤر ترّ إتنت۔

ھوریں رالی کہ إیشیءِ تھا جنیں و مردیں گوں إتنت، تمپءِ أواریں دگاں ترّاں بیت و بھر زیروکاں سرکاری ناھودگيانءِ خلافا دانک کوکـّار کت أنت۔ و بلوچ بندیگانءِ آزادی إش لوٹ إت۔ ھمے وڑا رالی ماں نادراھجاہ چارراھا مچ بیت۔ اودا شه مند بلوچ جنیں آدم گاڑی سرا آتک؛ ھؤر بیت أنت۔

مچّیءِ پاگواجھی بی إس او مند ھنکینءِ آرگنائزر مجیب ولی کت و خاصیں مھمان بانک کریمہ بلوچ أت۔ جارچینیءِ کار أصغر بلوچ وتی ذموا زرتگ أت۔

بانک کریمہ بلوچ گوں مچّیا وتی ترانا گشت کہ پہ بلوچءِ قومی جنزءِ پروش دیگا ریاست وڑ وڑیں پندل سازگا إنت۔ ھمدا بہ چار کہ میتگانءِ سرا بمبگواری کنگا إنت، پدا بہ گندئے قران پاکءِ ناما بلوچاں شہ کوھاں إیر گيجیت۔ برے بلوچ زالبولاں دستگیر و یا کشیت۔ و سرکارءِ گڈی پندل بلوچاں وت ماں وتا میڑینگ إنت۔

بانک کریمہ بلوچ گشت کہ واکداریں ریاست بہ زانت کہ لھتے زر خریدیں بلوچانءِ کمکا بلوچ نوجوان إیرموش کنگ نہ بنت۔
"مارا (بلوچ قوما) ھوریا پندل پرؤش دیگی أنت" بانکا گيئش کت۔

دیمترا درّائینت ئی "بی إس او ھنچؤش مجبور کنگ بوت کہ آ 'سبوتاژ' جُنزے بنگيج بہ کنت۔ وھدے کہ إیشی سوبینیءِ نیمگا روان أت، گڈا سرکارا 'سلطانی گواھے' درگپت و حالکارانءِ دیما آرت تاکہ بی إس اوءِ سرا بندش جنگ بہ بیت"۔

چدا پد مجیب ولی گشت کہ وھدے بلوچستان گرگ بوت، گڈا ھما درگتا آغا عبدالکریم پہ آزادیا تفنگ چست کت۔ ھما جنز بادے مروچی برجاہ إنت و تاں إے وھدی ھزاراں بلوچاں وتی جان ندر کتگ أنت۔ ھمے جنگ تاکہ آزادیءِ دستگرگا ألمّا برجاہ مانیت۔

آئیا گيئش کت "واکدار نیں بلوچ سرمچاراں ھنچوش گنوک کتگ أنت کہ ماں کوھاں جنگ کنگءِ بدلا ماں شھراں بے میاریں مردم مانترّینگ بیگا أنت کہ بشام بلوچ، سرباز بلوچ و یا آزاد بلوچ کئے أنت!"

گوں مچّیا بی إن إم مند ھنکینءِ جنیں باسک بانک خیریہ بلوچ ھم تران کت و گشت کہ بلوچ شھیداں پہ مئے نام و ننگءِ رکـّینگا وتی سر ندر کت أنت۔ پمیشا آوانءِ رندا روگ و قومی آزادیءِ گرگا پیئش گنزاں بیگ ضروری إنت۔