حالانءِ ردا چدا پیسر ھم سئے رندا عبدالحمید ریگيءَ سادا لوپ کنگءِ جار جنگ بیتگ، ألبت سرکاری واکاں وتی إرادہ مٹـّیناں کتگ۔

حالا داتگ کہ ھندی دادگاھےءَ دیریگاں آدگہ دوئیں کساں کشگءِ حکم داتہ بیتگ۔ ألبت آ شہ کلاّنیں دادگاها إجازتءِ ودارا بیتگ أنت۔ ھمے ھنیگاں کلانیں دادگاھا ھندی دادگاہءِ حکم رَوا منـّتگ۔

إیران پرئس نیوزءَ شہ 'سپاہ پاسداران'ءِ حالجاھا زرتگیں حالا دیمترا داتگ کہ سزا گپتگیں مردمانءِ سرا فسادکاری و ملکءِ سلامتیءِ خلافا پندلاں ھؤر بیگءِ میار لڈگ بیتگ أنت۔

ترانگ بہ کپ إت کہ 'جنبش مقاومت مردمی إیران' یا 'جندا۔۔۔'ءِ سروک عبدالمالک ریگیءَ گوستگیں ھفتگا درنجگ بیتگیں مردمانءِ نیاما دوکس وتی باسک ظاھر کتگ أنت۔

چدا پیسر ھم وھدے کہ عبدالحمید ریگی نامینے درنجگ بوت، گڈا جندا۔۔۔ءَ آئی؛ بے پؤلکاریا، عبدالمالک ریگيءِ برات ظاھر کت و دراجکشیں بیانے شنگ کت۔

مردماں ترس إنت کہ أگر جندا۔۔۔ ھمے وڑا إشتاپی بیان شنگ کناں بہ کنت، گڈا بے میاریں بلوچاں ھم نگيگیانءِ دیمپان کنگءِ سبب جؤر إبیت۔

تاں ھما وھدی کہ جسد دستگرگ نہ بیتگ أنت، زانگ بوت نہ کنت کہ باریں سرکاری واکاں ھما مردم درتکگ أنت کہ نام إش شنگ بیتگ أنت یا دگہ کس أنت۔