مشرقی بلوچستانءِ بلوچاں ماں بلوچستانءِ بازیں دمگاں و کراچیءَ إیرانی واکدارانءِ خلافا ظاھری دات۔ آواں جار پرّینت کہ أگر بلوچاں درنجگا إیران انگار مہ کنت، گڈا ماں پاکستان آتکگیں إیرانی إیمن نه بنت۔

'بلوچ جنیں آدمانءِ ھوربند'ءِ نیمگا ماں کوئٹہ، خضدار و کراچی پرئس کلبانءِ دیما مزنتریں لشکر مچ بیت أنت۔ اودا گوں اُستمان و حالکاراں سروکاں تران کت۔ تران کنوکاں إیران و پاکستان إیر جت أنت، و گشت إش کہ دویں ملک پہ بلوچانءِ پادمال کنگا ھوردست أنت۔

8 جون 2009ءَ کوئٹہءَ سرجم بیتگیں مچّیءِ سروکی داکٹر حانی بلوچ، بانک مھرجان بلوچ، بانک ماھرنگ بلوچ و بانک نگار بلوچ کت۔ إیشانءِ ھوریا چاکر قمبرانی، میر قادر بلوچ و پروفسر صبا دشتیاری گوں مچّیا تران کت۔

کوئٹہءِ تران کنوکاں گشت کہ گجراں زانگ لوٹیت کہ أگر زورگپتگیں بلوچستانءِ مردماں آ دستگیر و زوراکیانءِ آماچ کن أنت، گڈا مشرقی بلوچستانءِ مردم وتی مغربی بلوچ براتانءِ پلانگریا ألـمّا چست إبنت۔

آواں إیران ترانگ دات کہ گوں کشگا مردم ترسینگ و إیرموش نہ بنت۔ أگر چؤش بہ بوتیں أت، گڈا شہ 1928ءَ -کہ إیرانءَ مغربی بلوچستانءِ سروک میر دوست محمد بارانزئی شھید کت و بلوچستان گپت -تاھنوگا مردم بے توار یا گار بوتگ إتنت۔
"مردمان إیرموش کنگءِ تچکیں راہ آوانءِ حقاں منـّگ و دیگ إنت" سروکاں وتی تراناں پدّر کت۔
Rights reserved by www.balochinews.com ..