یک کـَلـّــَگے ءَ ، یک لوگے ءَ یک پشک و یک کچکے هست ات . آهاں هنچو دوست و مهروار اتنت که آهان اش گوں آپ و آچش چه یک و دگرا سِست و جتا کت نه کت .هوری ءَ وارت اش، هوری ءَ تـَـرّ و گـَرد ءَ دَرکپت انت ، هوری شکار ءَ شت انت و یکیں وهد ءَ وَپت انت . پشک گرمیں بهاری ءِ کـَش ءَ ، و کچک یک کنڈے ءَ ، دروازگ ءِ نزیک ءَ وپت و واب ءَ کت . آهاں تاں دیریں وهدے بے کـُجام گپ و شدتے ءَ ، دوستیں سنگت اتنت تانکه یک روچے بـْور بیت انت .
- اے چونیں زندے ! __ کچک نالـِـت ( نالِست ) . __ په دل ءِ مَئیل ءَ گـَپــِت هم نکنوں ! ...
- هـَـو ، دگرانی بهاری ءِ کـَـش ءَ واب کت نه کن ئے __ پــِـشّــُـک کـُـوْرّ ات __ دگرانی گوشت و پیگان ءَ بو چـِـت ( بو کت ) نه کن ئے ...
آهاں هـَنچو گـُرُنـڈاں بیت انت تا که آهر ءَ فیصله اش کت که گـِهتر و جوان انت که دنیای ءِ سـَـئیل و سـَواد ءَ درکـپ انت و دنیای ءَ بچار انت تا که دل ءَ گـَرکے به جنت و بودے بیاریت . گـُڑان وتی سـِجــِـل و کاگد اش زُرت انت و چه وتی گـَرمیں و نـَرمیں هـَـند و لوگ ءَ دَرکـَپت انت و راهاں روان بیت انت . هر نیمگے که چم گِنداں و پاداں بَران اتنت ، شُت انت . یک روچے شُت انت ، دو روچ شُت انت ، سیمی روچ ءَ آهانی راه ءَ مَزنیں آپے بَستگ ات .
په نَرازیں کچک ءَ اے جنجالے نه ات ، پرچا که اوژناگ ئی زانتگ ات ، بلے پشّک اوژناگ ءَ نزانت و آپ ءَ تُرسان ات . هنچو که دست ئی آپ ءَ مان کت ، هما دمان ءَ نـوْرّاں ءَ چه آپ ئی کـَـشّـِـت، تو گوئش ئئ لیڑیننت ئی .
- اگں من ءَ دراجبں بوٹ به بوتیں ، __ گوئشیت ، __ من گوئست کت . چو پاد لوچ ءَ ، اے آپ پرمن مزنیں بـَند و دیمپانے .
- مه گـُـرُنڈ ! __ نرازیں کچک گوئشت . __ زانان ما سنگت نئیں ؟ منی کسانیں برات منی پُشت ءَ سَرکـَپ ، تو چمانی پـَـلـَمکاں نه جَـن ئے که ما دومی تـَـیاب ءَ رَسیں . تهنا منی سجل و کاگد ءَ وتی پـَـجّی ءَ بزور که آپاں تــَـرّ مه بنت .
پشک وتی سنگت ءِ پشت ءَ سواربیت . کاگداں وتی دنتاناں داراں بیت که آپ ءَ مه لـَـگـُش انت و مه کپ انت
اوژناگ کناں بیت انت . آپ باز پراهیں آپے ات. یک ساهتے اوژناگ کناں شُت انت ، دو ساهت هم اوژناگ اش کت ، بے هبر و چپی ءَ .آپ هنگت نه کـٹـتگ ات . نراز بور بیتگ ات . جُست ئی کت :
- چون منی کسانیں برات ، آرام نشتگ ئے ؟ بارین نه لوٹ ئے که آپ ءَ اوژناگ کن ئے ؟
پشک ءِ دل هم لوٹـتگ ات که وتی سنگت ءِ جواب ءَ به دنت ، بلے ترس ات که دپ ءَ پچ کنت ، پرچا که کاگد ئی دنتاناں گوں داشتگ اتنت . کچک ایشی ءَ نزانتگ ات و سک بور بیتگ ات و لوٹت ئی که کسے آئی ءِ گون ءَ هبر بکنت .
- بلکیں پشک تو همودان واب کپتگ ئے ، هـُشکیں ، نرم و گـَرمیں جاهے ات واهندی کتگ ؟
پشک هنگت هم چـُـپ ات و کاگدانی دارگ ءَ دلگوش ات .
- اَهـّان ، گـَـپ - گـَـپ ! __ کچک گرم گپت و هنون آهاں آپ ءِ نیم ءَ رَستگ اتنت . __ زَلور تئی جند ءَ لوٹیت که هنون آپ ءَ مان به بئے و اوژناگ کن ئے ... جوان انت ایر کپ !
- منی برات ، من ءَ مه بـُـڑیں ! __ پشک وتی سرجمیں وسءَ کت و کچک ئی ساڑا ات و ناز دات که پر تـَـهمبـُـل پر زانت و شــَرّیں وپا داریں سنگتے . همے وهد ءَ کاگداں شـُرّ ، لـَـگـُـشت و آپ ءَ کـَپت انت ! و اوژناگ اش کت تا که چه آپ ءَ در کپت انت .
پشک وا دیست که چے بیتگ ، یک کمے هست ات که آئی ءِ جند هم ، آپ ءَ بـُـکّ ( بـُڈ ) ایت. بلے کچک تهنا تُرستگ ات که کاگد تـَّر مه بنت .
آهر ءَ دومی تیاب ءَ رَست و سر بیت انت . کچک وتی کاگدانی جُست ءَ کت . پشک هورکیں دستان ءَ پَچ کت که نیست انت کاگد .
- تو وت منی واجهیں برات میاریگ ئے ، من نه په وتی دل ءِ مـَئیل ءَ دپ ءَ پَچ کت و ...
نراز وتی پشکیں سنگت ءِ رندا کپت . دنتاناں دُرُشاں و پیش داران ات . تو گوئش ئے که اے سنگت نه انت بلکیں دُژمن انت . پشک تُرُس ات ، تتک و وتی جان ءِ رَکـّینگ ءِ جهد ئی کت . جنگ تیز و تیزتر بیان ات . نراز لوٹـتگ ات که پشک ءَ ٹـکـّر - ٹـکـّر و چـُنڈ -چـُنڈ به کنت . پشک پـَنجگولان ءَ هر نیمگ ءَ شهار دیان ات ، لوٹـت ئی که نراز ءِ چماں کور و به کشّیت . چه هما روچ ءَ ایشانی جنگ چست بیت که تا هنون هم ایشانی سُهل نه بیتگ و هر وهد که یک و دگر ءَ بگند انت ، جنگ ءَ اُست انت .
په همے هانرا هما همساهگان ءَ که یک و دگر ءَ وش نـَهنت و مدام جاک و گوانک انت ، گوئشنت اش که پشک و کچک ءِ داب ءَ دُژمن بیتگ انت .

مئی گـَپ کـُـٹــّـت !
هرکس ونتگ ، چـُٹــّـت !