1
جی، دو صد جی بات مير بٹـے خان ءَ
زرّک ءِ ول ءِ گہتريــــں جــــــــوان ءَ
ميريں نوروز ءِ بچ مزن شــــــــــان ءَ
آفرين باتی په ستّ و ايمــــــــــــــان ءَ
په وتی قومی گئيرت ومــــــــــــــــانءَ
په وتی ملک ءِ عزت ءُ شـــــــــــان ءَ
چو يل ءَ در کپتگ جنگ ءِ ميـــدان ءَ
کرخ ءِ تحصيل جت په اعــــــــلان ءَ
2
ميرولی محمد خان گون ئت گون مير ء
لانچتت جنگ ءَ په چو کلات گيــــــر ءَ
هر کجا اير ريهت و سپت چو گہگير ءَ
دشمنيں مردان گوں شلسريں تيـــــــر ءَ
زرّک ءِ ولّ ئت که چو چراگ نيـــــر ءَ
موهری بوتنت مان کرخ ءِ شپگيـــــر ءَ
کشت تحصيلدار ءَ و گپته نکچيــــــــرءَ
دشمن اچ تُرسائی لرزتنت ديــــــــــر ءَ
3
جہجتگ مستی خان مير، چه ديوا ن ءَ
په بلوچيگيــں عـــــزت و شــــــــا ن ءَ
مولہ ءَ شنگينت چو هار و توپـــــان ءَ
دُرُشت بديگان ءَ چو جنتــــــری دان ءَ
سهور کتگ چٹوک ءِ سنگ و گٹـّـان ءَ
دشمن ءِ حوناں گوں چو که الــــوان ءَ
نوک کتگ نامے په توکـــل ءُ مــــان ءَ
چو حمل جيند ءَ گوں پــرنگــــــــــان ءَ
4
مير بہـــــاول خـان موسيانــــــــــــيءَ
زهمجنيں ميرانی مَٹّ وثـــــــــــــانيءَ
هپت براں بیڑ داته سرگوئزانــــــــيءَ
هربرے شيرءَ په پہـــــــلوانـــــــــی ءَ
شنزگاں اير داته شلسرانــــــــــــــــی ءَ
من سرو پشتان دشمنـــانــــــــــــــــی ءَ
اشته يک نکشے من دؤر فانــــــــــی ءَ
کيهل ءَ، چار روچ ءِ زنــدگانـــــــــــی ءَ
5
همّت وننگ ءَ گوں بسته يــــــــاری ءَ
غلام رسول نامداريں نيچــــــــــاری ءَ
مـــں گــروگٹـّان نشتـــــه چـــــــاری ءَ
چو پلنگ گيرءَ و شير شــــــــکاری ءَ
دو گهراب باليگيں وار پــــــه واری ءَ
چو کپوت چاهی ءَ جت شکـــــــاری ءَ
راهســـرءَ مـان بستگ جيپ و لاری ءَ
مولہ ءَ جسکينت گـون گٹ و زہری ءَ
6
سبزل خان مردانی راه ءُ رهبنــــــد ءَ
دشمن ءِ فوجءَ ديست په بشکنـــــــدءَ
مير گٹّ و کيلءِ مں لوپ و سربنـــد ءَ
جنگی دات اَچ وت گشين گوں ده چندءَ
فوج ءِ کپتان ءَ جـــــت دل ءِ بنــــــــد ءَ
اَچ سپاهيگان دوری دات چنــــــــــــد ءَ
لاشگاں ڈير کرت چو بمـــا هنــــــــــد ءَ
کرگزو ڈونـڈوارِش بوئــــرنت رنــــد ءَ
7
ميرجمال خان چو گريشگ ءِ شيــر ءِ
دشمن ءَ آؤرت پنجـــــــگ ءِ چيـــــرءَ
په بلوچيگيں گئيـــرت و بيــــــــــــــرءَ
هچ نه کُرت کمّی لُده ئيـــــن شيــــــر ءَ
په مڑو جنگ ءَ داتـــــی چَوپيـــــــــر ءَ
جت، لگواشاں بوت دشمنان سيـــــرءَ
په وتی ننگانی حونی ئيں بيـــــــــــر ءَ
گپت حسابانش گــــوں زبر زيــــــــر ءَ
سرگليں ميران جنگ کتــگ ســــکّ ءَ
په وتی ملک ءَ و عــّزت و حـــــــکّ ءَ
سر نه چنڈينت چه توپ وتوپــــــــکءَ
صد هزار رحمــت باتــش يک يـــکءَ
په بلوچيـــگيــــں نگـــــــــده و دکّ ءَ
دَروَراِش پيــــــدا نيســـت بلاشـــــکّءَ
صدهزار رحمت زهری ءِ ٹــــــــــکّ ءَ
آفرين، شابـــــــــاش، مرحبـــــا لکّ ءَ
مير شهيد بوتنـت په وطـــــن مـــات ءَ
يک په يک پاهو اش داتــه بــد ذات ءَ
سکّهر ءِ جيـــل ءَ و حيـــدر آبـــــات ءَ
نوک کتنت نورائی مـــرد روايـــــات ءَ
مرحبا آوانـــــی بات پـــت ءُ مــــــات ءَ
په وطن بچّــــــان دات پـــه سوگـــات ءَ
زندگنــــت دائـــم مـــں بـــاگ جنّـــات ءَ
ثابــــت انت چـو، اَچ دُرّيــــــں آيـــات ءَ
اے بهرے انت چه "هپت هيکل ءُ جنگانی زراب"، سرشاعرمير گل خان نصير ءِ شعرانی کتاب هپتين شهيدانی باروا
چاپ کنيد
اين مطلب را برای يکی از دوستان خود ايميل کنيد