وهدے که منا إے حال شه پیتر تاچلءِ إیمیلا سر بیت، گڈا إے مچیا من بهر زیرگءِ إراده کت تاکه وتی همدریا گوں إیرانی جهدکاران که په دمکراسی إیمان إش هست، شون به دیاں. پیش چه روگ، منا اوپار نه بیت که ماں إے مچی و تظاهرات که دنیاءِ میدیا بزاں ریڈیو و ٹلوژن کاینت، بلوچ مظلوم و إعدامیان‏ءِ پوسترے مه براں. پمیشا من وتی زهگ کـڈن کت أنت تا شه منی فایلا دو هپتگ پیش ماں دزآپ یک نگیگیں پیمیا پاهو دیگ بیتگین سئے بلوچانءِ عکسا در بہ کن أنت۔ پدا آئیءِ سرا به نبیس أنت که:
Baloch Killed in Public by Iran
من إشتاپ إشتاپیا دیم په چاپءِ دکان رهادگ بیتاں۔ اودا دو کسانیں و یک مزنیں پوسترے چاپ کنائینت. شه چاپءِ دکان دیم په تظاهرات رهادگ و مچّیا سر بیتاں. لهم لهما من گوں مچیا هؤر بیتاں و بلوچ إعدامیانءِ پوستر برز برزءَ وتی دستان گپت و اوشتاتاں.
لھتے دماناں رند من دیست که منی داشتگیں بلوچانءِ إعدامءِ پوسترءِ نیمگا میدیا؛ ٹی وی و فوٹوگرافر دلگوش دیگا أنت وعکس و یا فیلم گِرگا أنت. منی راستی کشا کسان سالیں إیرانی بانوکے که إسلامی پوچانی تها أت، اوشتاتگ أت و ووٹان‏ءِ دزی بیگءِ خلافا دانک کوکار کنگا أت. باز جوش و پریاتا رند، چؤش که وسیں مرگاں إیرانءِ درتکگین همے بزگین بلوچانی پوسترا إے دُردانگیں بانوکءِ هژار و تیزیں چم کپت أنت. پوسترءِ سرا نبشتگ 'إیرانءَ بلوچ سرعام کـُشت أنت'.
إیرانی بانوکا دیست که ٹی وی و فوٹوگرافرانءِ توجه همے پوسترءِ نیمگا أنت؛ سک په درد بیت و وتی إعتراضے منا گشت که بلوچانءِ سرا إیرانءِ ظلم و کشتاراں دنیاءِ دیما ظاهر مه کناں! إیرانی بانوکا ترندیں گالوارےءَ گشت "إے پوسترا شون دئیگءِ إجازت نیست".
من پسو دات که إے پوسترا هچ دروغیں یا ناوشیں گپے إے تظاهراتءِ خلافا مان نیست و تظاهرات ماں إیران دمکراسی لوٹگا إنت. باید إنت که شما بلوچانءِ إعدام دیگ بیگ و کـُشگ بیگءِ خلافا به بی إت. پرچاکه بلوچانءِ سرا زوراکیءِ مسئله هم گوں إیرانءِ دمکراسیا همگرنچ إنت.

إیرانی بانوکءِ گٹ که په آزادی و دمکراسیا کوکـّار کتگیں دانکاں درتگ أت، زهرا پُـر بیت و حکم ئی دات که من شہ تظاهراتا در به کپاں! آئی گشت که شما بلوچ کوشستا إت که إیرانءَ نزور کن إت و به پروش إتی. پدا گشت ئی که من آئیءِ کشا مه اوشتاں. گیئشی کت که وتی عکسا گوں بلوچ إعدامیانءِ پوسترا گندگا آ واهوک نه إنت.
من جست کت که شما زوراکیءِ خلافا وتا شون دی إت، چونکا عیب زان إت که شمئے دردانگین عکس گوں مظلومیں بلوچاں گرگ به بیت؟ إیرانی بانوکا پسو دات که آ په إیرانءِ تپاکی و یکجاه دارگا جهد کنگا إنت و إے پوستر بلوچءِ مسئلوا پیش کنت.
من گـُشت که بلوچان أگر شما إیرانی نه منّ إت، گڈا تچک تچکا به گـُش إت تا هر کس پؤه به بیت. إیرانی بانوکءِ دیم ترندتر بیت و شه منی کش شت تاکه تظاهراتءِ سربراهاں سر پد به کنت که بلوچ أتکگ أنت و دنیاءِ میدیا؛ ٹی وی و فوٹوگرافرانءِ دیما بلوچانءِ کشگ بیگءِ سـَـنَد و پوستراں شون دیگا أنت.
دمانےءَ رند، إیرانیانءِ توار سست و خاموشی بیت و شه گوانکو بزاں لاوڈ إسپیکرا جار جنگ بوت که لهتے گوں وتی پوستراں أتکگ أنت و تظاهراتا بیراه کنگ لوٹ أنت. من وهدے که إے گپ إشکت، گڈا گوں وت گشتاں که إیرانءِ دمکراسیءِ کاروان هچبرمنزلا سر نه بیت.
ألبت من گوں بلوچ إعدامیانءِ پوسترا همودا اوشتاتاں. په من شه إیرانی ووٹانءِ سر چیر کنگ بیگا، بلوچانءِ جان و حرمتءِ دفاع بازمهمتر أت. بلـّی توریں إیرانءِ دمکراسی و إیرانی جهدکارانءِ حمایتا من شتگ إتاں. بلے باز دیر نه گوَست که په إیرانءِ دموکراسی کنگا جهدکنوکانءِ نقاب شه دیما لکوشت أنت و آوانءِ باطن پدّر بیت. ھینـّےءَ پد تظاهراتءِ سربراهاں یک پهلوانیں ورنائے په منی در کنگا روان دات. إے ورناءَ سرجنانا منا ودی کت و گشت ئی که بلوچ إعدامیانءِ پوسترا آ باز ناوش إنت. پدا گیئش ئی کت که تظاهراتءِ تها ترا چٹا إجازت نیست.
من په آرامی گـُشت که بلوچ إعدامیانءِ پوسترا گوں إیرانءِ دمکراسی بیگا هچ تضاد یا مشکل نیست. شما مهربانی کن إت؛ منا إے پوسترا دارگ و إیرانءِ ظلماں پاشک کنگءِ إجازتا به دی إت.
وهدے که آئی بےدلیل و جواب ترّ إت، گڈا زهرا ترکگی بیت و حکم ئی دات تا شہ آوانءِ تظاهراتا من رسگا به رواں. همے درگتا آئیا پلیس گوانک جَت تاکه آ منا به گـُشیت که إیرانءِ دمکراسی تظاهراتا همراه بیگءِ إجازت منا نیست.
پلیسا مئے بلوچ إعدامیانی پوستر چار إت و نبشته ونت. من گوں پلیس گـُشت که واجہ پیتر تاچلءَ منا إے تظاهرات لوٹائینتگ و پیتر أصلی آرگنائیزر إنت. دومی إیش که إے تظاهرات په إیرانءِ دمکراسیا إنت، إے پوسترءِ چکـّا بلوچانءِ سرا ظلم و إعداماں أبید دگه هچ نیست که په تظاهراتا رد و جنجالی به بیت. معذوریں پلیس سرپد بیت و گوں من گـُشتی که آ شہ آرگنائیزرانءِ گپا در بیت نه کنت، پمیشا بهتر همیش إنت که وتی راها به گراں و شہ إے إیرانیانءِ تظاهرات به رواں. من وتی پوستر زُرت و شہ درایگا پیسر لوٹ إت که وتی دوست ڈاکٹر عبدالستار دوشوکیءَ رکست به کناں، بلے إیرانءِ دمکراسیءِ پانک جنوکاں پلیس سُکین دات که همشیءِ إجازتا هم منا مه دات.
إے نبشتانک من پمیشا نبیس إت تا بلوچ شری سرا به زان أنت که دمکرات و غیر دمکرات؛ کل إیرانی بلوچ قوما وتی غلام لیک أنت و په بلوچءِ درد و رنجا إیرانیاں هچ پرواه نه بیتگ، نے که دیمترا گـَرَز إش بیت. أگر مرچی إیرانی په دمکراسی، آزادی و لیبرالیزما گپ جن أنت؛ تیوکا په وتی جندا جن أنت.
إیرانی جماعتان شون دات که ماں نگیگتریں وھداں حاضر نه أنت تا دمکراسیا یونیورسل به زان أنت و په هر کسا دموکراسی به لوٹ أنت. إیرانی دمکراسیءِ پانک جنوک ماں دیار غیر و یورپءَ إے وهدا که نفس إش کیرکیر کنگا إنت؛ بلوچاں إجازت نه دی أنت تا آه به کش أنت، دنیاءَ به گـُش أنت که بلوچانءِ سرا هم ظلم بیگا إنت. وهدے که زور و واک إش بیت، گڈا شما وت أندازه به جن إت که بلوچانءِ عاقبت چؤن إبیت! همے إعدام، لٹ کُٹ و غلامیءِ لوپ.
سالاں سال إنت که إیرانءِ سیاست من چارتگ و من وت بلوچءِ جهدا گون بیتگاں۔ پمیشا شہ إیرانیانءِ إے پیمیں حرکتاں حیران نیاں. من سرپداں إیش إیرانیانءِ قومی غرور إنت که هر شـَرّیا وتی میراث به لیک أنت و غلامیا بلوچ و دگرانءِ ونڈ به منّ أنت. آوانءِ خیالا بلوچانءِ إیردستی و غلامی یرانیان یک جاه و ملکا سرجم داریت. إیرانءِ هنوگیں چست إیر آوانءِ وتی جیڑوے إنت. و مهمتر إش که دمکراسیءِ باروا آوانءِ سرپدی شه بنداتا رد إنت. پمیشا إیرانءِ دمکراسیءِ کاروان هچبر وتی منزلا سر نه بیت. بلوچ إے خوش خیالیءِ شکار وتا مه کن أنت که بلوچانءِ مسایل ماں دمکراتیکیں إیران حل إبنت.

سوبین بات بلوچءِ جد و جهد
لندن- پنچشنبه 18 جون 2009